Зошто дождот лие,
знете ли, деца, вие?
Топло сонце водата ја грее,
своите зраци, над реките
езерата и морињата
во целиот свет ги сее.
Водата кон синото небо
испарува лесно
се збира во облаци
додека не ѝ стане тесно.
А потоа што се случува,
да врне дожд, кој одлучува?
Една до друга капките
во облаци стојат –
се здружуваат заедно
и големи капки се бројат.
Облакот станува тежок –
за сите капки место нема,
па паѓаат на земјата
без никаква дилема.
Каква корист дождот дава,
па има толкава слава?
Корисен е дождот
за земјата наша родна,
без капките дожд
не може да биде плодна.
Ги полни реките, езерата,
водата назад ја носи,
за потоа повторно
дождец да роси!
Автор: Славица Тодорова